زبن الدريك

عليك مع طول السنين المقابيل
بالخير في خيرٍ من الخير زايد
والعز يا عز الرجال المشاكيل
يا سيدي يا أحمد وسيع البنايد
زبن الدريك اللي على غرقة السيل
يا عنك ما يشكي عليك الضهايد
الا ويبشر بالفرج والتساهيل
يوم انت مشهود الوفاء بالشدايد
يذري ذراك لموهن الحال والحيل
لفتتك تطفي عنه حر الوقايد
وتصير له بلسم شفاء مثل ما قيل
كم واحدٍ مملوك فضلك وشايد
بفعولك اللي يتعبن الرياجيل
منها ليا جات العلوم الوكايد
ودار الحديث مدعم بالدواليل
انصاف مظلومٍ عطاه اللهايد
خصمٍ ظلومٍ مستبدٍ بتظليل
والله ليذكر موقفك بالحمايد
ويقول عاش اللي عدل واقعد الميل
سنايده يا أحمد ونعم السنايد
بالحق لين يروح مستوفي الكيل
هذا انت يابا الطيّبه والعوايد
ما هوب يرجع قاصْدك بالغرابيل
يعود مسرورٍ همومه بدايد
ومن الفرح يصدح بشعر ومواويل
مثلي بهاذيك السنين النكايد
يوم ألتجي لك يا رفيع المنازيل
وتصير لي من جود جوداك جايد
لين انفتح لي بابها عقب تقفيل
عز الله انك وافي بالوعايد
وانك جدير بالثناء والتنافيل
يا ابن الذي ما ينجبن الخرايد
مثله زعيمٍ يتعب الهجن والخيل
عبدالعزيز اللي يضد الضدايد
على النقا بالمرهفات المصاقيل
جامع شتات شمول ناسٍ بعايد
باسم السعودية لجيلٍ بعد جيل
عساه في جنّات عدنٍ برايد
مرحوم ما يعرض على النار في ويل
ندعو له الله من قلوبٍ ودايد
حقٍ لبو تركي علينا وتجليل
والحمد لله خير والأمن سايد
بجهودكم رغمٍ على أهل الاباطيل
زمرة أبليس وخاربين العقايد
خابوا وخسروا موعدينٍ بتنكيل
واسلم وعيدك بالمسرّات عايد
يا سيّدي طول السنين المقابيل
مشعل بن نوار بن منير المقاطي