عزيز النفس

حبيبي لا الوهم عشته ولا مت بغرابيلك
ولا حدتني الدنيا على شي يبكيني
ترى من حزة غيابك وانا ناسي مواصيلك
عزيز النفس ما تقدر ولو لحظه تعنيني
تقول إنك معذبني واقول بعيد ياحليلك
بعيد عنك يالجافي تغربني وتشقيني
انا لي خاطرٍ يقسا بعد حبك وتدليلك
وانا لو رحت للغربه ادل ارجع.. عناويني
وانا لو ذقت حرمانك ومرتني مواويلك
اصد وابتسم لك مع الايام ناسيني
وانا لو ملت باحساسي وصار يروح ويجي لك
اعرف شلون تلعب بي واعرف شلون تغليني
اميز بين حرمانك وجرح من فراقي لك
واعرف اللي تشمت بي واعرف اللي يواسيني
احب بصدق لكني إذا صديت ما اجي لك
ولا اتعب على شانك اذا شفتك تجافيني
ابادل بالجفا طبعك ولا يمكن اناديلك
واناجي بالغلا عصفور لا غرد يناديني
اذا حب البشر اعمى فلا تفرح بتحليلك
انا ما ينعمي قلبي اذا عقلي يقديني
واذا قصدك قصيدي فيك وشي من كلامي لك
فانا شاعر وقالوها اهيم بعكس ما فيني
كتبت الشعر من قبلك وزدته من تعاليلك
وصارت دفتر الذكرى كلام في دواويني
تعلمت الوفاء منك وصدق الليل من ليلك
وتعلمت الجفا بعدك وكذب الصبح في عيني
لا وضح ولا فسر ولا ودي بتعليلك
غيابك شي جربته وصار بماضي سنيني