حان الوداع

دار الزمن حتى فرق بين خلين
يالله تكمل دورته بالسلامة
من بعد كون القلب واحد بجسمين
صارت طعون وكل قلب بنظامه
يا صاحبي بلاّه قلّي على وين؟
فكرّ ترى بعض التصرف غشامه
لكن ليا فكرت مالي معك دين
روحي عسا الله يسعدك يالحمامة
تلقين من يتبعك بالناس تلقين
أنا منعتني عزتي والشهامة
ما والله اتبع في حياتي مقفين
لو مات نشمي ما تحقق مرامه
عندي كرامه لو عشقت المزايين
لا عاش حبٍ هان عندي كرامه
لو جار وقتي بالشدايد مع اللين
يا بنت ماني مرخي لبنت هامه
صحيح أحبك واعشقك يا ريش العين
ماني بكاذب والعيون العلامة
لو قلت نمت الليل وين البراهين
عيني تقول: إنه قليل منامه
ولو قلت سالي وابتسم بالحجاجين
قالت شفاتي ما نشوف ابتسامة
ولو قلت جسمي مايعاني من البين
قال اللحم نشكي وتشكي عظامه
يعني كذا ما فيه معنا وفيين
إلا دموع الطفل ساعة فطامه
وما دام خانت ضحكتي للشفاتين
يا دمعتي خوني ليوم القيامه
ما عاد ابي من فوق خدي تسيلين
إلا ليا سالت طعوس الثمامه
كنا وكانت ضحكة الوقت لثنين
واليوم يضحك لك وأنا في عسامه
أسهر بليلي واعرف إنك تنامين
واعرف منامك فوق ريش النعامه
وانا أتقلب طول ليلي لجنبين
كني سجين الصبح موعد عدامه
سقت الخطا يمك من العمر عامين
والله ما حصلت غير الندامه
لكن كشفتك بس تضحك على مين؟
الليل نكشف عقربه في ظلامه
وحان الوداع اللي من العام تبغين
وجيتك عشان أودعك بالسلامة