هذي قناعاتي

اسمك ليا مني نطقته ذاب في فمي الكلام
كن يتكسر في فمي وتذوب قطعة سكره
ان كان قلبك ما احتوى حبي على الدنيا السلام
وان كان ظني فيك ما خاب أحمد الله واشكره
أعرف معنى الحب لكن ما عرف ويش الهيام
حتى قطعت لدوحة الغالين كرت وتذكره
يا درة على مريض القلب وعيال الحرام
(حرام) والمشبوه والمسبوه طبعه تنكره
أشوفها واقف لها بين الغلا والاحترام
وانسى العتب واللوم ما يطري عليّ ولا اذكره
أطلق نظر عيني على حسن يثير الاهتمام
بين ألف أميزها ولو هي بينهن متنكره
حبيبتي جمالها خلى لها قدر ومقام
جمالها من ذاتها ما هوب صبغ وسمكره
باب يجيني منه ريحة عطرها يفتح دوام
علي لوم الغاليه لو أدفعه واسكره
مالي بقلب ما يعيش إلا تحت جنح الظلام
اللي حياته كلها ما قط حب ولا كره
قلبي معودني على حب الكريمه والكرام
صافيه بالحب المزيف مستحيل أعكره
هذي قناعاتي وأنا أحب المبادي والنظام
وهذي حصيلة ما تعلمته بسن مبكره