أسرة وفا

صور من الصحراء

وأنا أبحث في مراجع لدي بين قديم وجديد وبعضها أوراق متفرقة استوقفتني القصيدة التالية وهي وإن كانت لشاعر معاصر إلا أنها تستحق أن تمثل هذه الزاوية لما حملته من معان سامية ومشاعر صادقة:
بسم الذي نزل تبارك ولقمان
الواحد المعبود منجي خليله
الهادي البادي على كل ما كان
وادعوه باسماه العظام الجليله
المستعان اللي على الكون رحمان
الله يجعل سعينا في سبيله
والشكر له والحمد في كل الأحيان
ونطلب رضاه وروسنا تنحني له
باسمه بديت وينخزي كل شيطان
ونظمت من فكري معاني جزيله
وقلت وعلى ما قلت للقيل برهان
ملفاه شيال الحمول الثقيلة
سلام يا عبدالعزيز بن سلمان
يابن الملوك اللي أخطاهم طويله
سلمت يمينك يا سلائل كحيلان
باللي كسبت المرجله والفضيله
وأطلب لك التوفيق من عالي الشان
اللي وضع فيك الصفات الجميله
دين وتواضع واستقامه ورفعان
ويمناك بالمدات ما هي بخيله
لك في سنام المجد منزل وعنوان
وسموكم ظل المعزه مقيله
رباك شيال المحامل بليهان
الحاكم اللي منصبه يستوي له
سلمان سلمان المكارم والإحسان
أبو فهد عز النفوس الذليله
ريف الضعيف وللملاهيف مزبان
وبالظالم المظلوم يشفي غليله
عدل وبنان وقمع طغيان وإنسان
وحمل الضعيف اللي تردى بشيله
هو سور نجد إلى غشاء الجو دخان
ويشرف اللي بالنسب ينتمي له
والبيت ما يبنا على غير عمدان
والسيل مهما كان يتبع مسيله
ومن يزرع الريحان يثمر بريحان
ومن يزرع التنباك يلقا مثيله
من غاص غبات البحر جاب مرجان
وأهل العزايم يكسبون النفيله
حكامنا المقرن صواريم حوران
أطلب من الله حكمهم ما يزيله
معدن ذهب عال النسب غال الأثمان
فصيلة يا طيبها من فصيله
أسرة وفاء ظل ودفا وعدل وإيمان
أمن ورخاء وبذل وسخاء ينثني له
فرسان بالميدان للحق ميزان
ولكل وقت رجال من روس جيله
عبدالعزيز أدلى بها تقل شيهان
وداست على روس الشياطين خيله
جمع شتات الناس حضرة وبدوان
خلا بها كل القبائل قبيله
جزاه من مولاه رحمه وغفران
جعله مع اللي يدخلون الوسيله
وبعده عياله طوعوا كل عصيان
وأركو على كبد المعادي مليله
في عهد أبو فيصل تجلا للأعيان
بانت وهي كانت شبه مستحيله
عمت مشاريع الرخاء كل ميدان
ومواصلا جهده نهاره وليله
يمناه أبو متعب وشلفاه سلطان
داروا عجلها وعدلوا كل ميله
من عقب ما كانت صحاري وكثبان
اليوم فيها الناطحات المهيله
وصارت عدود البادية مدن واسكان
والخير قادم والمصاعب قليله
والعدل ساس الملك في كل الأديان
نبينا بالشرع وضح دليله
هذي شهادة حق من قلب ولسان
أقولها والعبد ربه كفيله
من ينكر المعروف مفتن وجبان
الله يجعل عثرته من شليله
وصلاة ربي عد ما هل ودان
على النبي عداد وبل المخيله
سعود علي حيلان الدمجاني العنزي