قصة غرام

أنا لي صاحب دايم يهددني على فرقاه
وكلمة نفترق يا صعبها لنكان ناويها
وأنا أحبه محبة صادقة من خاطري وأهواه
عسى الله ما يجيب الساعة اللي نفترق فيها
حبيبٍ ذقت انا طعم المحبه كلها وياه
وكيف اليوم صفحة حبنا بالحزن نطويها
تهنيت بغرامه والله أني حالف ما أنساه
ولا فكرت أبنسى صاحبي والعشرة أنهيها
عطيته صادق الاخلاص وأمشي دائماً برضاه
وكل أجروحه اللي قالها بالصدق أداويها
ولكنه يهددني وانا مدري وش اللي جاه
يهددني بفرقا قاتله ماني براضيها
أظنه مستمع هرج العواذل يوم زل أخطاه
وقال الكلمة اللي حركت هاجس مغنيها
وخلا صاحبه يلعب مع القيفان في معناه
يالين الليل جاء مع ظلمته يمه مضويها
وسرى هاجسه بالشعر والألحان ما تغواه
وردد كلمته لا يا زمن لا لا تسويها
وهلحين أنشر بيوت الشعر يالله عسى يقراه
وهذي قصتي للشعر والصفحه وقاريها