كم واحدٍ يفرح الى شاف سلطان

شد الحزام وساعة الجد حانت
ما للأمور إلا أنت يا عالي الشان
حياتنا وشلون كانت وكانت
العز عز الراس والزود نقصان
قدامنا ناسٍ كثيرٍ تفانت
وبقيت مآثرهم على مر الأزمان
ولا تدرك الأمجاد قومٍ توانت
ولا ياصل الغاية سوى طير حوران
لولا الصرامة كان الأيام شانت
ولولا السياسة قاسي الوقت مازان
حسادنا مهما لنا اليوم زانت
يا كثرهم لو يفتح الوقت بيبان
صدورهم بالغل دومٍ تزانت
وعيونهم فيها دلايل وبرهان
عدونا بالذل والهم قانت
وصديقنا يسكن على راس ما بان
كم دولةٍ لاذت بنا واستعانت
وكم واحدٍ يفرح الى شاف سلطان
عون الضعيف اللي حياته تدانت
وعوق الخصيم اللي مغوّيه شيطان
وكم أسرةٍ من مد جودك تغانت
وكم من يتيمٍ عنه بددت الأحزان
الناس في ظلك هدت واستكانت
لك قدرةٍ تفوق قدرات الإنسان
تعمل نهار وليل والنفس عانت
وأجرك على اللي كوّن الإنس والجان
ترك ضعيفٍ قال الأيام خانت
ما كل من غاص البحر جاب مرجان
وآن الأوان وساعة الجد آنت
ما للأمور الا أنت يا عز الأوطان
خالد بن سعد بن فهد بن سعد آل سعود