ورقة قديمة

ياما عذلت القلب لاشك ما طاع
ولا هو على بعض المعاني سنوعي
غاب وعمى ماله من البين مطلاع
متحير ماله مناع منوعي
وا ونتي مالي من الناس فزاع
ولا فكنا كل القبايل بطوعي
واكتلت من لوعات الايام بالصاع
ولاهي على راسي كثير ربوعي
غصب على الغالين يطلعن الادماع
والصبر والله منزله بالضلوعي
وانا بدبرة سامك العرش قناع
ولاني من اللي يقسم الله جزوعي
يا عالم بالغيب يا مبري الاوجاع
يا مالك الدنيا بصير سموعي
تاسف لمن قلبه غدا حصو مقلاع
والا فحم كير يشبه قطوعي
على حبيب حال من دونه القاع
عذب عذي عايز بالطبوعي
تفهم ليا غضيت يمه بالاصباع
والناس ما تدري على اياة نوعي
وليا طلبته حاجة جت بالاسراع
اسرع من العبرة بنثر الدموعي
وان جاه شي ما تدور به اطماع
ولا هي من اللي يدهلونه بشوعي
ولانا من اللي يدحم الوجه مرتاع
لو غبت عنها خاطري بالسنوعي
وان جو منا كيف مع البر جواع
طار الخبيث ليا لفوا عقب جوعي
وبه ذارب ما تطلع البيت مخراع
ما علمت قوايمه للطلوعي
ماهي من اللي لامشت تقل سعساع
مثل هريف الذيب بين النجوعي
وبه ذارب كنه على الديد مرضاع
أسخى من الوالد حلي النفوعي
بقلبٍ صخي عايز الطبع مطواع
لو اشتمه تضحك وتمشي بطوعي
يا مصخر الحوته ليونس بالاضلاع
يا خالق الاثمار من كل نوعي
بجاهك وجاه اللي للاسلام شفاع
المصطفى سيد قريش الشفوعي
تجعل لها في جنة الخلد مجضاع
ارجيك ياللي منك ترجا النفوعي
على الصراط ليا مشت باع وذراع
لمحة بصر او سبق برق لموعي
لو يعرضن عذبات الانياب فراع
متولع قلبي بها وطار شوعي