سلطان الحب

سلموا على اللي هز قلبي غرامه
هزة جبال فيها نار بركان ثاير
حدني للهوى وأصبحت تحت استلامه
وانكشف سري اللي مختفي بالضماير
ولو تعرضت من سبة غرامه ملامه
أتجاهل وأقول الحب سلطان جاير
يا عمر كيف ينسى القلب غاية مرامه
وكيف أباصبر وقلبي فوق حر السعاير
لا بعث لي سلام ولا وصلني كلامه
ولا أدري الوضع عنده يا عمر كيف صاير
حالتي حالة اللي ساكنً في تهامه
بس مضنون عينه في بلاد الجزاير
يا عمر من تولع به تزايد هيامه
ولا تقبل كلام اللي من الناس شاير
يا عمر قبل يحصل وقت فيه الندامه
إفهم الوضع بالفاهم بزين البصاير
وأنظر لحالة العاشق ووصل سلامه
يم منهو من أسبابه ترى الفكر حاير
وأخبره قول من حبك تكدر منامه
ما بقى إلا من اسبابك يهل العباير
ذقت ما ذاق قيس اللي هوى الزين ضامه
ومن سهوم الهوى دارت عليه الدواير