قالوا تصبر

جو الأقارب والمعارف يعزون
بالوالده يارحمة الله عليها
قالوا تصبر ما أراد الله يكون
والموت سكة كلنا سالكيها
سكة بها كل المخاليق يمشون
ونهايةٍ كل الملا تنتهيها
قلت أشهد أني صابرٍ بس تدرون
للموت رهبه كلكم خابريها
وإلى بكيت أمي فلا لي تلومون
ماظنتي أنلام يا ناس فيها
أبكي وكل الخلق للموت يبكون
ياعين دمعاتك على أمي أنثريها
وشلون ما أبكي فراقها عاد وشلون
وفي برها الجنه وتحت قدميها
معذور لو لفراقها صرت محزون
ولفراقها عم الحزن عارفيها
ولو تفتدى بالروح روحي لها تهون
وبكل ما أملك أنا أفتديها
من وين لي من بعدها أم تكون
من وين لي أمٍ أقبل يديها
يا جعلها يارب في روض وعيون
تنزل عليها رحمتك وتفشيها
وتفوز بالفردوس مع من يفوزون
وعفوك وغفرانك لها ووالديها
والله أكبر سنة الله بالكون
ذا يفارق الدنيا وهذا يجيها
هذا يعزونه وذا له يهنون
وكل ابن آدم ساعته يحتريها
سليمان بن صالح الصالح الخزيم