عسى الغفران واللطف فالك

في رثاء الفقيد/ حامد بن فهد العلوي الحربي رحمه الله وأسكنه فسيح جناته والهم ذويه الصبر والسلوان
مرحوم ياللي من سمع بك دعا لك
واللي حضر دفنك من القلب يبكون
سمع بك اللي ماعرفك ورثاء لك
ودعاء لك اللي تالي الليل يقرون
عزالله إنه كل خير بكالك
وبقلوبهم من كل الاعماق يدعون
ياعل رب البيت يلطف بحالك
وياخذك بالرحمه وبالعطف والهون
ويجبر مصيبة يالفقيده عيالك
ويعظم أجر اللي بغيبتك محزون
تذكرك بالإحسان لاجاء مجالك
ويذكرك بالمعروف ناس يحسون
تنفق يمينك ما تعلم شمالك
طيب ووفا يوم أن الاجواد يعطون
تفزع بحالك يالبناخي ومالك
وبشاشة بك صافيه مالها لون
ومن جاك يطلع ماشبع من قبالك
وعلى كثر جياتهم مايملون
عجزت والله لا أتناسى خيالك
فقيدة نبكيك من قلب وعيون
مار الرجاء بعيالك اللي مثالك
ربيتهم مثلك على الطيب يمشون
احدا مشى وأحدا على المتن شالك
وأحدٍ بكى وأحدٍ به الحزن مكنون
ويالله عسى الغفران واللطف فالك
نطلب لك الغفران من والي الكون
ونرجي من المولى يرد القضاء لك
ويصبر اللي فاقدينك ويسلون