لهيب الوقايد

قصيدة رثاء في جدي/ عبدالمحسن دحيم بن عيد الحنتوشي العتيبي.
علم لفاني شتت الفكر باشتات
واونست في كبدي لهيب الوقايد
البارحة جريت لي عشر ونات
ولاذقت حلو النوم فوق الوسايد
تذرف عيوني دمع حزن وحسرات
على فقيد راح ماهوب عايد
يا الله دخيلك في الليالي الصعيبات
لاجا نهار فيه هم ونكايد
ماصار صار ولا عن الموت حوصات
مكتوب والمكتوب ما عنه حايد
من قال جدي مات ياعيد ما مات
مادام ذكره في المجالس سحايد
يالله يامحيي العظام الهشيمات
يارافع سبع بليا عمايد
تغفر ذنوب اللي له الطيب عادات
قلبه نظيف وما يعرف الحسايد
صديق صادق ما يعرف الرديات
ولا هو من اللي مشيته في نقايد
الجار له عنده جميع المعزات
وتشهد له الجيران علم وكايد
يفز لضيوفه بصدق وشهامات
من قلب صافي مارجى بالفوايد
ومن الصخا تقطر يدينه جزيلات
ويكثر ما قلط لربعه موايد
مرحوم يامن له يعوني ذريفات
تنشر لك البيضا نهار الوعايد
الله يوسعلك بقبرك مسافات
ويمد لك نور بوسط اللحايد
الله يبيحك عد الاحيا والاموات
وعداد ما يطلع على الجورايد
ياجعل يسقى قبر راعي المنيفات
من مزنة تبرق وترعد رعايد
لو اطمع ان الشعر وترديد الابيات
ينفع لغني طول عمري قصايد
وختامها صلوا كثير الصلوات
على الرسول عداد هب التوايد