رجم الطيب

لو المراجل تنوخذ بالمهاداه
كل كسبها واصبحت شيء عادي
مير المراجل ما تجي بالمراواه
الا بصبر وهمة واجتهادي
صبرٍ على ميل الزمان وقساياه
ومشارك اهل الطيب في كل مادي
ومن لا صبر ما نال شفه ومشهاه
ومن دون غاياته يحده حوادي
الصبر ما كل المخاليق تقواه
والطيب سندا والمراجل سنادي
الطيب رجمٍ بتعب الناس مرقاه
ما يعتلونه قاصرين الايادي
قلته وقالوه الرجال المسماه
اهل المواقف والوفا والرشادي
اللي لهم عند الولي والملا جاه
كسابة الطاله صقور الهدادي
ومن لا يميز في مساره وممشاه
وعلى المكارم والمروه بفادي
وتسبق على فعل المواجيب يمناه
وينهج مناهج كل رجلٍ سدادي
وعلى الرفاقه ما يسارع بعوجاه
ولا يستمع في هرج راع الدوادي
اللي على الشانه تسابق مطاياه
ويفرح ليا ناش الفتيل الزنادي
يفرح ليا شاف الردى في دناياه
ويشبك ببعض الناس مثل القرادي
عسى مرامه بأول الوقت تنعاه
وعليه تلبس من ثياب الحدادي
مطلق خالد الحويقل العتيبي