ورقة قديمة

قلب الخطا شفته عن الزاد ملاع
من شوفتي حمرا تقاصر خطاها
متغير زين التخلخال باظلاع
ياسين يايد سابقي ويش جاها
عسى لها رب المقادير مناع
ما ادري سبب او لطمة في حذاها
اشوف قلبي عقب هاالضلع مرتاع
الهقوه انه عين قرد رماها
ما نيب من اللي دبر الرب جزاع
يا ليت من يدري بغاية دواها
انه يدور بين شاري وبياع
اطلب عسى مولاي يدفع بلاها
الخير اللي للمقادير دفاع
السابق اللي شف بالي مناها
لا قربوا لسروجهن كل مطواع
لا قربوا شخص الرمك من كساها
دنوا لي اللي كنها عنز مقطاع
لا شافت القناص غر رماها
وحلت على زوله على السد قباع
جوادي اللي كل شيخ بغاها
ولاني بهرج اللي بغاها بسماع
تهيا لي الحمرا وانا اقصر خطاها
لا طار ستر مخوتمة عشر الاصباع
ابغي الى جا ساعة من وراها
عند الملاقى تعترض تقل فراع
عند الطحوس اللي هفت في غذاها
والخيل من ضرب المزاليج تلاع
يمنى يقصر فعلها عن حكاها
تقصر عن السمن المذيب إلى ماع
ان كان عقب الكون ما اطري ثناها
تعدى عن الفنجال به خمسة انواع
مع لابة بالضيق تروي قناها
لباسة الماهود مع سمر الادراع
ذباحة لعداه في ملتقاها
على ظهور مجاذبة كل مصراع
بصوارم كن المشاعل سناها
يشبع بها طير الخضيرا الى جياع
وكم سربة منهم يتاما فلاها
من كف كل مجرب قد له اوقاع
حريبنا نسحن لعينه دواها
من هو يكيل بمد نوفيه بالصاع
نقدا مظاهير طوال خطاها
ياما حرمنا هجمة كل مرباع
تاتي مراكيب توامى لحاها
يبغى العوافي عقب ما كان طماع
راع النفود وخده اللي وراها
يجفل الى منا نوينا بمرباع
مناقر الصمان خلي شفاها
عفى جوانبها ظفر كل قطاع
الى انثرت دهم السحايب بماها
غدا القرا والصلب نبته له انواع
كم ديرة قفر رعينا حماها
لا طاح من غر الهماليل لماع
راكان بن حثلين