أنت الذخر للمسلمين

للوطن

يا جابر العظم الكسير اليا غدى مثل الطحين
يا كاسر الجبار مثل عاد ارم ذات العماد
لك الثنا والحمد حمد الشاكرين الذاكرين
حمد يليق بوجهك الجليل يا رب العباد
ياجب على الرجال لاجا الواجب الحاظي يبين
يبذل قصارى الجهد ويجد وعلى الله الاعتماد
الشعر ديوان المشاعر والمواقف والسنين
وانا قصيدي دم تنبض به شرايين الفؤاد
هبت هبوبه كادي ونرجس وفل ويا سمين
وعنبر ومسك وعود تنفح به ذعاذيع البراد
للعز يا دولة هل العوجا كعام العايلين
بيضا ولا غيرالحجر الاسود ذكر فيها سواد
فيها الحرمين الشريفة قبلة للمسلمين
من ليلة الاسراء والمعراج لايوم المعاد
في حضنها ضمت رسول الله خير المرسلين
وعلى ظهرها نشروا الابطال رايات الجهاد
هنا مداهيل النبي والصحب والروح الامين
هنا رسوم العز والامجاد لازالت جداد
هنا توارثنا المراجل مثل ورث الوالدين
هنا تعلمنا مفاهيم التسامح والعناد
هنا بنا ابن سعود قصر شامخ وحصن حصين
تحت ركونه راحت الفتنة وجمرتها رماد
مية سنة مرت لنا عميت عيون الحاسدين
حنا يد وحده على حرب الجريمة والفساد
واليوم عيدنا وحنا كل يوم معيدين
الله يطول عمر ابو فيصل فهد راعي الشداد
النا الفخر بالموقف اللي شرفه ذرب اليمين
عشرين حجة يزرع لشعبه ويجنون الحصاد
شواهد الاعيان مبنى التوسعة للحرمين
والجامعات السبع والاف المدارس في البلاد
وعشرات وميات المعاهد للبنات وللبنين
حتى المسن بمحو الامية تعلم واستفاد
في الامن والعمران والصحة نعد الاولين
وفي ريادة الفضا وطفرات الرخا والاقتصاد
هاذي غنايمنا يعيش لنا عشير الغانمين
فهد ولولا فهد واخوانه ما حققنا المراد
لو نكتب اسمك يا فهد بين القمر والفرقدين
اشرق شروق الشمس في يوم من ايام العياد
انت الذخر للمسلمين بكل ارض وكل حين
وانت الملاذ لمن شوت كبده غبينة الاضطهاد
وانت اللي اجزلت العطا في نصره أولى القبلتين
وانت اللي ان جا المسلمين خلاف ما جاك الرقاد
وانت اللي سياستك ما تضعف وعزمك ما يلين
عند احتكام المعضلات اللي تبي حزم ورشاد
ان كان للأمة خليفة فانت أمير المؤمنين
انجدد البيعة يا بو فيصل قناعة واعتقاد
على الولا ولا يزعزعنا ارجاف المرجفين
مثل الجبال الزحّل اللي ما تساق ولا تقاد