بكاه العالم بأسره

لا والله ليلة البارح بكاه وطوّح عقاله..
يا أمه يا وطن منهو يلوم اللي بكا غاليه..
ومن يبكي ابوه اللوم هل هو يلحق عياله..
بكا ليل الرياض البارحه ماكن حيٍ فيه..
على كثر الحزن خيم سكون وحالته حاله..
بكا حزن وبكا فقد.. يتيمٍ مات من يعطيه..
وجاوبه الوطن يبكي بحزن وحيل يرثاله..
بكته ارض السلام بكل شبرٍ مر به طاريه..
بكاه العالم بأسره وحزنه يسحب حباله..
بكته الأرض وأهل الأرض عياله اهله محبيه..
بكاه الجود وأهل الجود واللي ماتهياله..
بكيته والله الشاهد كأني بنته وتبكيه..
وانا بنته وكل اللي سكن هالأرض من آله..
ابونا ايه ابونا كلنا وشلون مانبكيه مانرثيه..
وحنا نسكن بضفه وطن آمن وهو شاله..
عليه أزكى سلام ودعوةٍ عند الله تزكيه..
محلل من رعاياه ومباح من اصغر رجاله..
عسى الله يرحمه والله كريمٍ يوم هو يدعيه..
يبي يعطيه كثر اللي عطا ويشوف مدهاله..
كريمٍ والكريم الله يحبه والله يجازيه..
وعبدالله عطاه الله صفات وخصّه لحاله..
عساه من الوجيه اللي ملايكتك تباشرفيه..
عساه لجنةٍ عرض السمآ ويشوف منزاله..
عساه بجنة الفردوس ينعم كثر مانغليه..
من أبواب النعيم يشوف منزاله ومدخاله..
- الشاعرة/ عيون المها