شاعر وأكثر من صورة

يا كثر هرج العرب ياصعب تحليله
الا على من عرف معناه واهدافه
وانا أعرف العلم لكن ما معي حيلة
وشلون اعدل سنام الثور واكتافه
* *
مسايرة
ساير زمانك كان لك قلب وضلوع
وارج الفرج بايامك المقبلاتي
وان كان ما طاعتك خلك لها طوع
ما انته بضاربها برمح الزناتي
* *
تجربة
التجربة برهان ما فية تكذيب
واليا جهلت انشد من القوم شايب
ولا اقول يوجد شايب يعلم الغيب
الغيب يعلم به مدير الهبايب
* *
حيرة
وقتٍ يخلي صاحي الفكر يحتار
ويشوف من هول الدهر ما يروعه
تلقى الفقير وفزعته خمسة انفار
وتلقى الغني كل الجماعة فزوعه
- رشيد الزلامي