دلّل طموحك

الشاعر العذب عبدالله الراشد وقصيدة جديدة لها منحى آخر عن قصائده الغزلية الرقيقة.. حيث الحنو والتوجيه والبوح بلغة النصح الجاد:
يا فيصل الوقت متمرد وأنا خالك
ومستعجلٍ.. وإن تغافلته تنبّه لي
عطني من الوقت حقك وقت وأفضى لك
وخذ وقتي اللي ماهو راكد.. وربّه لي
هذا عرقي بورقي.. من جبهتي جالك
وهذا قلمي مير قبل يجف عبّه لي
اقلط على الشمس وانطحني على فالك..
أو هات ظلك من العرْوه.. وصبه لي
دلل طموحك وجب له كيك.. في بالك
وان قلت له وين حلمك روح جيبه لي
من دلّة العلم أبيك تهز فنجالك
ودنق على خشم علمك ثم حبه لي
خلّك من الله قريب وحقق آمالك
ولا تشيل هم الزمان ولا تسبّه لي
تراك غالي ولك تقديرٍ لحالك
ومن كثر ما أغليك شفتك صرت يشبه لي
لازم يا فيصل تحط أحلامك قبالك
واكتب تحت كل حلم اسمه.. ونبه لي
عقبى لك أعلى الرتب والعرس وعيالك
وأنا أقنع الوقت وأشرط وش يجيبه لي
الشاعر: عبدالله الراشد