جمهور محايد

يوم شفت ان الهموم انواع والتعبير كايد
والاماني كل ماطال الزمن صارت بعيدة
قلت ياشعري تراني منتظر منك الفرايد
وقال لاتزمل وانا موجود والدنيا مديدة
انتهض مثل الحرار اللي تولم للطرايد
ثم عبر عن هجوس القلب ولسانك بريده
شاعرٍ لاطب بالميدان سجل له قصايد
صفقي له يالحروف وغطرفي له يالقصيدة
لين قام ورفّع الاعلام جمهورٍ محايد
وخضعت له مهرة القيفان لو صارت عنيدة
ياعذولي ياعذولي نم وكبّر فالوسايد
الزمن عقبك بلاني لين حقق ما يريده
كل ماقلت الدروب العوج تورد للنقايد
اعترض ناس تفلسف مثل فلسفة الجريدة
والقهر ناس لها سمت وتقاليد وعوايد
اعرضوا عن تبعها والقرش صاروا من عبيده
اخلفو كل الحقايق مابقى منها شرايد
وكل ضد جا محله من جهالتهم ضديده
الفرح كنه تعازي والعزا كنه معايد
وصارت الحرجة حلال وصارت الجزلة زهيدة
بس وش حيلة حريصٍ يرتجي درب الفوايد
يتبع الدرب العوج؟ والا يرد الناس سيده؟
ايه انا ادري بالجواب وخابر التحقيق كايد
والاماني كل ماطال الزمن صارت بعيدة
عبد الرحمن العريفي