لامرك أقبلت كلي

الله يا قابل دعا الحي للميت
احفظ لساني بالخطا لايزل
ما غيرك الغفار لا أذنبت واخطيت
عفوك رجاي ولامرك اقبلت كلي
وإلى نطقت الحق ما قيل زليت
الجد يفرق عن مجال التسلي
اساير الدنيا بعد شفت واوحيت
وحصلت احد يعقد والآخر يحلي
وأخذت من بعض العلوم وتحريت
ولاهان راس في وفاه متعلي
وبينت للي زود النار بالزيت
ان الحياة تقوم من دون غلي
ويقول همه كبر ابانات وكميت
خلاه ياقف بين شمسٍ وظلي
قلت استمع لي يوم بالصوت ناديت
لا ترجع علومك على طير ياللي
من لا يقدر جيتك لا تعنيت
اعتب على نفسك وخله يولي
حتى لو انه شايع الذكر والصيت
ما للحسايف والتمني محل
للنفس عزه والمكارم لها بيت
والا تفاهات الزمن تضمحلي
دام الوفا موجود باسمه تسميت
لا تجرح احساسك ورايك يدلي
والى رجيت ولا حصل ما ترجيت
اترك خيالٍ عن سماك متجلي
ينفعك ربك كل ما أصبحت وأمسيت
في طاعته عز ومعاصيك ذلي
وانا لغيرك يالولي ما تشكيت
جودك وعطفك يكفي اليا حصل لي
مالي مطامع والنهاية الى اقفيت
محفوظ كل اللي عملت بسجلي
اطلب رضاك ورحمتك وان تمنيت
حسن الختام بسجدتي يوم اصل
أحمد سعود الحمد - الزلفي