الحروف المريبة

بدر بن ماجد بن ربيعان شاعر متمكن يميل كثيرا للرمزية في أشعاره صافحنا بنص جديد:
أتنقى حروفي قبل ما خط جابه
لاتشابه عليه ثم يكثر نشبها
الحروف المريبه لو تمر الرقابه
ما تعدي عليها لين يعرف نسبها
راعي العقل ياخذ من خطاه ل صوابه
وراعي الحلم نفسه مايساير غضبها
بين نبح (الك....) وبين عوي الذيابه
الليالي تدور ومستمرٍ عجبها
من يقول الليالي كلبوها تشابه
جاهلٍ بالحظوظ ولا عرف من وهبها !!
ياعذولي وش اللي شفت بي من غرابه
اكثر اسقام عيني من سبايب هدبها
قبل تومي بسيفٍ في يميني نصابه
نخلة الجود عنا من يمن برطبها !
ليه اخايل بروقٍ في نصوب السحابه
والعطاشا زمان الجدب بيد تعبها
دوك صدري وانا اللي كل صدري رحابه
ماتحمل من الأصحاب شرهة عتبها
كل ما حن وارزم ونس ولا كأبه
جاوب الورق لكن ما شعاني طربها
وين مزن تشابك بارقه مع ربابه
قبل تشكي الجزيرة من غباوة عربها
كل ما أرخى ثعوله ما يرفع عقابه
لين يلبس محول القاع زاهي سلبها
وان طرحت السؤال ولا لقيت الاجابه ؟
ماش نار تلظى ما يزود حطبها
بدر بن ماجد بن عمر بن ربيعان