من شعر المراسلات

درج الشعراء منذ الأزل على تبادل القصائد في مواضيع شتى، وسمي هذا اللون ب«الاخوانيات» أو «النقائض» في جانب آخر وفي شعرنا الشعبي تسمى «المراسلات».. وفي هذا العدد نقدم قصيدتين بين الشاعرين المعروفين ناصر عبدالله المسيميري وبدر بن عواد الحويفي حيث كانت القصيدة الأولى للشاعر المسيميري إذ يقول مخاطباً الحويفي:
يا بدر بن عواد يا طيب الساس
يا شاعر تقدر على الحلّ والربط
والله يا عوجٍ تجي من بعض ناس
عوج إلى سمعتها ترفع الضغط
يذبح ويسلخ مثل عنتر وجساس
ويدخل لك الكنه ويظهر لك الشبط
ولا الكرام كنه ادهام بن دواس
وباقي المراجل حطها كلها ببط
يا بدر حيثك عارفٍ كل الأجناس
علّق على الموضوع لا هنت بالضبط
ناصر المسيميري
وهذا رد الشاعر بدر الحويفي:
أهلاً وسهلاً عد ما هب نسناس
ببيات جتني والقريحة بحر نبط
من صاحب طيب وشاعر وحساس
رجال يازن كلمته ما خبط خبط
يشكي وأنا مالي رقابه على الناس
واللي سلم من شرهم غابطه غبط
وان كان ناصر مزعجه شخص هلاس
الواجب أنه ينصحه ما نقول أبط
كان امتثل ولا على هامت الرأس
حط الصليب وشاهد الوسم بالزبط
والا اتركه تكسب معزه ونوماس
تجزاه بالخصران وايهبطه هبط
هجره ينزل قيمته وزن وقياس
ان ماحصله من عطيب السهم عبط
هذا جوابي جارك الله من الباس
نداي جاك وعندك الحل والربط