حلول اللغز

نشرنا في عدد الاسبوع الماضي لغزاً كتبه الشاعر سويد عقلا العنزي من محافظة الخرج يقول فيه:
أنشدك عن عذرا وفي بطنها بنت
مذكورةٍ بكتاب رب البريه
ماهي غريبه,, انجبت بنت لاهنت
وتصير جدة امها هالبنيه
وقد وصلتنا عشرات الحلول اخترنا منها ماكان صحيحاً ومكملاً لشروط النشر,, فجاءت كما يلي:
نزّلت انا العزبه عن البر هونت
ما دام ينقص عزبتي سكرية
هي هيبة الجلسه الى انك تفطنت
مع دلة صفرا قليلٍ حليه
نايف محمد الأسيد
القريات
***
يامرحبا ياكاتب اللغز واحسنت
احسنت في نظم البيوت العليه
عبر الجزيرة برسل الخط لك انت
جوابه التمره حسب مالديه
مسفر فهد السبيعي
الأحساء
***
طالعت بالنخله وفكرت واعلنت
اعلنت عرفي للنفوس الرضيه
ابعث لكم حله بعد ماتيقنت
بالتمره ونواتها الاولية
محمد علي السالمي
رفحاء
***
ياسويد العقلا بلغزك تفننت
عبر التراث اللي لأهلها وفيه
حله بدا لاهنت لحظة تمعنت
في تمرة قلبتها في يديه
فهد بن عقيل الطويان
بريدة
***
مبداي باسم الله رب به آمنت
في نظم حل اللغز هو والتحيه
عرفت انا حله عقب ماتمعنت
عقب البطا نبعث حلول قوية
يابو حمد اكتب جوابي ولاهنت
جوابي التمره خطتك المنيه
راشد بن ناصر الشقيق
الأسياح
***
احسنت في لغز تخيرته احسنت
يومه نوى تمر النخيل الحليه
زاد لذيذ يوكل وين ماكنت
غرسه سقاه المزن صبح وعشيه
فضل سعد الكثيري
الحريق
***
يامرحبا ياللي بلغزك تفننت
في صفحة معنا تراها وفيه
تقصد نواة التمره وقل لي احسنت
واقول لك مني سلام وتحيه
عطا الله سليمان العطا الله
الزلفي
***
يالوا يلي يامرحبا بك ولاهنت
عداد ماتخضر فياض سنيه
لغزك ياعقلا حله ليا تفطنت
النخله للعراف ماهي خفيه
منيف مقبل الغرابي
النبقية
***
طرحت لغزك يابن وايل وانا امعنت
وحليت لغزك ماتكود عليه
الفيد جدة بنتها سر واعلنت
والام تمره يا اهل الشاذليه
لافي طعيس الحيسوني
حائل
***
بابيات لغزك يالسنافي تمعنت
ولقيت له حلول ماهي شويه
مقصودك التمره بلاشك لاهنت
وباقي الحلول اقول خله خفيه
صالح عبدالله الزرير
الرس
***
الظاهر اني لحل لغزك تمكنت
واللغز مايصعب بحله عليه
حله ترى التمره ايقنت واعلنت
وارسلت حله مع جزيل التحيه
بدر ملهي المخلفي
الحناكية
***
قبل الصلاة بنصف ساعة تسننت
واخذت مصحف والمشاعر نقيه
وبآيات مريم يابن عقلا تمعنت
معناك غطى بالرطب ظاهريه
محمد عبدالكريم الغزي
الزلفي
***
يامرحبا بالقرم من حيث ماكنت
تحية تصلك مني هديه
واللغز حله يافتى الجود لاهنت
يمكن نواة التمر تصبح وديه
خليف الحربي
الرياض
***
يالوايلي في نظم قيفانك احسنت
ولمحرر الصفحه سلام وتحيه
هيضتني بابيات لغزك وهيجنت
حلو النخل ياحان موسم مجيه
ماني مزارع مار فيها تمعنت
ويغرس نواها في شواطئ سريه
دخيل فضي الشملاني
الرياض
***
الوايلي غنى وقولوا له احسنت
وافي وساق الوافيه له مطيه
من حشمته كاني على حضرته منت
اهديه من تمر الحسا كم هديه
فهد الجروان
الزلفي
***
ياللي كتبت اللغز لاهنت واحسنت
لاهنت والله يازبون الونيه
اللغز مايحتاج له كشف وبرنت
تمر القصيم الحلو والا سريه
عبدالهادي العرجاني
الأفلاج
***
لا ياسويد قمت باللغز واحسنت
واجدت وصف التمر ميه بميه
في محكم التنزيل لامن تمعنت
تلقى لمريم فيه قصه جليه
مشعل سالم العتيبي
هرمولة
***
ياسويد يوم انك بلغزك تفننت
يامرحبا واهلين من طيب نيه
وياماحلا لو يجتمع وين ماكنت
تمر القصيم ودلة شاذليه
محمد بن معتق الحربي
عنيزة
***
يامتابع الالغاز من وين ماكنت
ردد وقل للقرم لافض فيه
معناه وافي كان شفت وتمعنت
تلقى الرطب بعذوق هالسكريه
عبدالرمن الجروان
الزلفي
***
اهدي عليك التمر من حيث ماكنت
لو كان فاكس اليوم يحمل هديه
عذراك تمره وفصمتها هي البنت
اسلم وسلم والخواطر رضيه
فهد الحزاب
الرس
***
من حل لغزك ياعزيزي تمكنت
توفيق من ربي كشفنا خفيه
التمره المقصود والفصمه البنت
هذا الجواب ولك كثير التحيه
محمد ناصر الزيدي