حلول اللغز

نشرنا في عدد الاسبوع الماضي لغز كتبه الشاعر مبارك ال عامر وكان نصه:
ويش بنت في المره مثل ماهي في الرجال
عايشه وسط البشر من كبير ومن صغير
صانها الرحمن,, سبحان خلاق الجبال
من طبايعها الكرم,, والبخل شي يسير
وقد جاءتنا عشرات الحلول,, وكانت الحلول الصحيحة كما يلي:
مايدرّج في ثقيل الحمول إلا الجمال
وما يحدث بالتجارب سوى رجل خبير
قالة قيلت وسارت على درب المثال
وشفت انا فصيلة الدم في ورد وصدير
محمد عبدالله البهلال
بقيق
***
قال من يبدي جوابه ولله الكمال
والمعاني لاختفت صعبها عندي يسير
كل شخص له فصيلة بدمه واحتمال
ياكريمه او بخيله عقب فحص الخبير
حجي سليمان الحجي
محافظة عنيزة
***
اول ما أبدا بالتحيه قبل حل السؤال
تهنئة بالعيد تحمل معاها كل خير
وآخرالموضوع نضرب على رمز المقال
لين فصيلة الدم تطلع على الراس الطرير
خليف الحربي
الرياض
***
المطر يامبارك ابرك واخير من الزلال
الكلور يخلي الصوديوم مثل العصير
الفصيله تشتبه والبخل لوهو حلال
نكرهه ويحاربه سلمنا وامره خطير
محمد عبدالكريم الغزي
الزلفي
***
يالحميدي كيف حظي معك ماله مجال
كل ماسقته مع الدرب عيا لايسير
ويابن عامر مرحبا بك عدد وبل الخيال
الفصيلة حل لغزك عسى دربك يسير
محمد بن حمد البدر
الزلفي
***
يا اهل المعروف يالطيبين امن الرجال
كلمة يشهد بها العيد باليوم السرير
شاقني لغز على صدر وافية الجمال
من فصيلة دمها تسقي العلم الغزير
نافع الحربي
الرياض
***
دامت افراح الجزيرة على مر الليال
يا عليم بالخفايا وماكن الضمير
لغز الاسبوع اتضح والمعرفة راس مال
كل دم له فصيلة بتحليل الخبير
محمد هذال آل بريك
اتصالات الرياض
***
مرحبا ترحيبة فيك ياولد الحلال
يوم جبت اللغز قلنا عسى مقسوم خير
هاك حله ياولد عامر بليا جدال
الفصيلة عايشه وسط دمك لاتحير
عبدالله حمد البدر
الزلفي
***
غايتي ومناي في قرب سمحين القبال
الرجال اللي على الطيب ماقفهم شهير
الجمالة,, والجمايل,, لهم سلم وخصال
ماتغيرهم فصيلة ولا هرجه مشير
فهد الجروان
الزلفي
***
مرحبا بك عد ماهب نسناس الشمال
وحل لغزك نعرفه عندنا ماهو عسير
والاجابه يابن عامر على قدر السؤال
كل دمٍ له فصيلة ويعرفها الخبير
عطا الله بن سليمان العطا الله