تاريخ الفخر والبطولة

ألقيت القصيدة الجزله التالية بين يدي سيدي ولي العهد الأمير سلطان بن عبدالعزيز وسيدي النائب الثاني الأمير نايف بن عبدالعزيز وسيدي الأمير سلمان بن عبدالعزيز أمير منطقة الرياض أطال الله أعمارهم وأدام عزهم قبل أيام من نشرها، وكما أن الوطنية، والوفاء، والولاء، هي امتداد من الأصل للفرع فإن والد الشاعر الجزل الذي يخص «مدارات شعبية» بهذه الرائعة محمد الصفيان هو صوت العارض المجلجل صاحب قصيدة العرضة الحربية المشهورة «نحمد الله جت على ما نتمنا» الشاعر الكبير عبدالرحمن بن سعد الصفيان رحمه الله:
المجد يبقى للزحازيح الأبطال
اللي بنو بمصقّل السيف دوله
اللي لهم ملكٍ قديمٍ ولا زال
يوم الملوك الغانمين أرتكو له
خيّالة العوجا بلا شك وجدال
تاريخ كامل للفخر والبطولة
من وين ما حلّو سلاطين ورجال
تضرب لهم كبد الذلول الرحوله
وأقرب مثل نايف قطع بعد الأميال
تقدير نايف للوصل والرجوله
هذي حقيقه ما هي أقوال قوّال
وأكبر دليل اللي عنوله وجوله
سلطان أبو خالد منازله مدهال
منصى الشيوخ اللي فخرها وصوله
سلام يا اللي للثقيلات شيّال
حلال صعب المعضلات المهوله
تحيةٍ من صادق القلب تنقال
نبدي ولانا للملوك الزحوله
يا الله عسى عمرك مسرّات وطوال
ويضفي عليك الخير كامل شموله
وأثني سلامي وأحكم القاف وأمثال
وأخذ مع القيفان صوله وجوله
وأنصى بها سلمان تاقف وتهتال
تاقف مهابه والفكر في ذهوله
صنديد ابن صنديد فارس وخيّال
مقدام وأسرج للمعارك خيوله
سجل بطولاته تواريخ وأجيال
درس الوفاء والتضحية من فعوله
كسّاب للطولات والشامخ العال
وترى المعالي ما تجي بالسهوله
وماهي غريبه للزحازيح الأبطال
اللي بنو بمصقّل السيف دوله
الشاعر: محمد بن عبدالرحمن الصفيان