ليت الورق

البارح القلب يكتب والسهر يقرا
والليل دفتر عجز يتحمل عتابي
قلت انقض الجرح واجعل سيرته مسرى
مليت اروح بقصيدٍ مابعد جاء بي
حنيت لك يالقصيد العذب وأنت أدرى
يا أغلى وأجمل وأعز وأطهر أحبابي
من غبت والناس كن نفوسها قشرا
ألطفهم اللي كسر روحي وهلابي
يامرحبا وإن لفيت وصادفك غدرا
عزاي بإنك تميزني عن ألقابي
الجرح يبرى لو إن الوقت مايبرى
شف وقتي اللي خذلني ويش سوى بي
والجاهل اللي يبينا نفترق وأزرى
اللي قصر عن سماي يعود لترابي
أكتبك سيلٍ يجي له فالورق مجرى
وليا كتبت .. نبت فالطرس غيّابي
تدري بلاش اكتبتك والناس ماتقرا
يكفيني إنك أعز وأطهر أحبابي
* شاعر سعودي