عاشق مقهور

نويت ابدا الكلام وكل ما قبل الكلام شعور
يموت بداخلي واخفي من اللوعة تعابيره
بنيت من الغلا له قصر ومديت القصيد جسور
وقلت إنت الحبيب وكل ما في الكون لمنيره
عطيته كفي اليمنى وقلت آمر وانا با الشور
فداك العمر لو كثرت على دربك مخاسيره
نسيت إن الحكي يا صاحبي في خافق مهجور
خل مابه إحساس ولا ذره من الغيره
مثل من يزرع الصبخا شجر ويبثها ببذور
يناظر زرعه ويرجي متى تظهر تباشيره
عرفته قاسي ٍجبار ومع هذا بعد مغرور
جبل لا هزه الإعصار ولا حرك محاذيره
واظن اللي جذبني له كرامة عاشقٍ مقهور
خذا منه الزمن واجد ولا فكر بتقديره
تجاهل قلبي الشاري وهو في صدته معذور
قليل الحظ خانت به بها الدنيا مشاويره
نوى يثأر لمجنون الهوى في داخله ويثور
على ذلٍ ملك نفسه وسيرها بتدبيره
نعم لا كانت الدنيا وهو فيها ذليل شعور
بيعلنها فراق وجعل بالفرقى مية خيره