أحلام البسيطين

صباح الأحلام يأخذنا على وين
واحنا غلابا ولا نعرف شقاوة
مصير الأحلام دايم بين ثنتين
إما مرارة وجع وإلا حلاوة
يا أحلامنا رتبينا من هنا لين؟
تنفس الصبح في طهر النقاوة!
وإلا ارجعي واكتبينا بين سطرين؟
أجساد وأرواحها ذبلت حفاوة
نبت السهر في محاجرها من سنين
وتقاسمت صبرها بذل ونخاوة
ترتل أنفاسها مابين قوسين
وتزداد زحمة أمانيها فضاوة
ويشرب سهرها الحنين وسطوة البين
وتموت في كبرياء وفي زهاوة
كأنها تستعير من السهد عين
تسبر بها الصبح وأنفاس الطراوة
مزحومة بالتعب وأسماء غريبين
وملامح أحباب تشهقها غلاوة
تقرا المدى من يقين وبعض تخمين
ويكبر وجعها بتقنين وهداوة
هذي هي أرواح وأحلام البسيطين
اللي سما أحزانها فيها رهاوة