بيَاتِي

الله على صوتك يجنن
يشبه الما
يوم ينساب بصباح الخير
من كفّين أمي
صوتك الناي
وأنا صدري عطش
وأحتاج فمي
صوتك اغناية
على نغم البياتي
لحنها يشبه بكاء القلب فجأة
وقبلها خدران وهاجد
صوتك أشبه للكثير من التسلطن
بس أقرب للشجن
من حنجرة راشد الماجد
ما فقدتي صوتي وإلاّ ما يهمّك
ما حلمتي مرّة إني كنت يمّك
ما سألتي الليل عني من وصلتي
افتكرت انك فقدتيني وسألتي
وزاد شوقك في غيابي وزاد همّك
ما تزاعلتي مع قلبك عشاني
ما تركتي دمعة عيونك تعاني
صدقيني كل شي حولي سألني
الوله والشوق وحتى من خذلني
حتى قلبي وده من شوقه يلمّك
علميني منين جيتي ووين رحتي
وليش غبتِ فجأة عني لو سمحتي
ورجّعي الضحكة لعيوني واضحكيها
ضحكتك والله كل يوم احتريها
ودي أسمع حيل أنا أحبك واهمك
انت دلوعة وطن
انت من مثلك حرام يكون وصفه ممكناً
انت مثل الحب
لا... الحب مثلك
انت من صوتك أجن
لما حسيت برذاذك
خفت من نفسي كثير
عادتي كل مرة لا طقطق مطر
أركض أركض لين أوصل للأخير
والحين ما اظن العمر يقوى
وانا ماني صغير
بس صوتك رجّع الدنيا لورا
لأيام كانت تغزل الشمس بعيون صغارها
تفتح أقرب غيمة
واتمَشْط المشاعر
تنده أبعد قلب
لو ما كان شاعر
وتحنّي له أحاسيسه
وْتحرقه بنارها
الله على صوتك يجنن