الحقيقة - "كاشو"

ادري أن الجماعة في التلفزيون زعلانين علي لانني في اليومين الماضيين اشتغلت عليهم، ولكن ياجماعة لا تلومني لان الجماعة استغلوا تسكيرة سوق الاسهم بدري ونادوا الضيوف اللي ياثقل بعضهم على المشاهد.
ولما انتهينا من ابو الخواتم طلع علينا برنامج القرار اللي فيه فكرة حلوة بس اللي"بط"كبدي المكالمة اللي سووها مع الضيف الأجنبي اللي صار ينبط علينا وينظر وكنه افهم واحرص منا على دورينا وهو مع احترامي يبغا يسوي"شو"لنفسه مع العلم ان عنده برنامج عن الكورة السعودية وضيوفه دايم رجال أعمال!..
حنا مانقول أن البرنامج ماهوب زين بالعكس البرنامج ازين من الزين، لكن الضيف هو الشين.
وها الضيف يلعب علينا بمجلته التي تطلع في كل بلد بغلاف عن البلد مختلف عشان يلخم الكل ويرضيهم شفتوني اسافر واجد، وصدقوني ان المجلة تطبع بدعم محلي، ويبيع جائزة ... عفواً يقدم جائزة لأحسن لاعب وحظنا انها دايم للاعبينا وللي رؤساء أنديتهم برضه رجال أعمال ... يعني سالفته لخم في لخم وتراها مصخت واجد.
ليت الضيف مايدخل نفسه في لاعبينا وانديتنا لانه وهق صديقه رئيس النادي المونديالي بلاعب من موطنه وفي الاخير طلع اللاعب خرطي وسالفة خوينا اللي بوديه النمسا برضها"كاشو".
ابن البلد
iabalad@maktoob.com