الحقيقة - الوعد قدام

تصدقون اني ما أحب المشاكل ولا"اداني"التناحر بين مسؤولي الأندية لأنها تنعكس على الجماهير وتعصبهم وعلى الرياضة بشكل عام، وفي نفس الوقت استغرب من اللي يستغل عنوان المثالية عشان يمارس التعصب ومطاردة الحكام ويندفع بالحيل واليوم الثاني يطلع"يرقع"ويتكلم عن الاخلاق والروح الرياضية بعد ما يكون"خابص الشغلة"و"حايقها حوق".
عموماً هالحكي"موب"مقصود به أحد لكنه بشكل عام وللي"طراه"- يعني اللي جاب السيرة - الخطوة الرائعة للزميل المهدي اللي جمع فيها الرئيسين وقال لهم ترا الصح أبرك واثقلوا تراكم صرتوا زي الصغار و"انشبتو"خلق الله والجماهير بمناقركم.
طبعاً اللقاء المميز أغلبه"ترقيص"واعلامي بالدرجة الأولى لكنه ممتاز في نفس الوقت.
والمشكلة ان البعض للأسف الشديد يراهن انهم ما"يصملون"و"بيتناقرون"من أول مباراة ولا انتقال لاعب وبترجع"حليمة لعادتها القديمة"لأن اللي في الخاطر"موب"متغير.
لكن نقول لأصحاب هالرأي انكم سوداويين - ياعمري على سوداويين - وكلامكم غلط والمفروض تشجعون مثل هالخطوات الايجابية ما تحاربونها ياللي تدورون الشر ... وشكراً للرئيسين وللزملاء اللي سعوا لها الخطوة وخلونا نشوف ... يلا نشوف - فيكم طرب؟ -.
ابن البلد
iabalad@maktoob.com