الحقيقة - قابل للكسر

وش هاالنادي اللي كل أعضاء شرفه ومسؤوليه ومسيريه"قابلين للكسر"...
الرئيس زعل وقال وراكم حاشيني وترك النادي... والثاني حشهم وقال أبترك لكم النادي وأروح أتابع"الخيول"أبرك من ناديكم"المنتهي"... والثالث طق وقال وراكم تحشوني بتصريح وقرر إنه مو يترك النادي بس إلا يترك الوسط الرياضي كله لكم.. أنا أقترح إنهم يغيرون شعار النادي ويحطون ذيك الكاسة المكسورة الحمراء..."طبعاً اللي ما يسافرون واجد مثلي أو ما عندهم عفش غالي شرواي ما يعرفونها"... على الأقل تكون شعار معبر عن وضع النادي... عموماً هذي عوايدهم وكلنا نتذكر رئيس هيئة أعضاء الشرف اللي كان كل يومين وهو قامز بتصريح، وطلع في المواجهة وآخرتها استقال ولا شفناه إلا يوم قلدوه ثلاثة وصار زيه زيهم... قال أبغير وطلع بتصريح ويمكن يرجع للنادي، لأنه بالطريقة هذي كلهم صاروا زيه وما عاد صار"متميز"عن أحد إلا ب".........".
عاد تصدقون من تذكرت وأنا أشوف هاالاستقالات والابتعادات والزعل والتكشير... تذكرت عادل إمام وهو يوصف المسلسل ويقول"وماتت حبيبة البطل ومات البطل ومات المصورون ومات مدير الانتاج ثم مات المخرج وأخيراً مات المشاهدون"... والله يرحمهم برحمته... ويحفظكم.
ابن البلد
iabalad@maktoob.com