تبغاها من جد.. تصير جدة ( غير ) !! (8)

لقد أسمعت إذ ناديت حيا
ولكنه طنشك عنك بالجوال
مو هي ذي روح المدينة وطابعها ونمط الحياة فيه؟ لو بقينا على كذا يا جماعة طيب، بس المسألة بتزيد.. يا راح نمرض، أو ما راح نطيق بعضنا لو فضلنا نضايق بعض في الشوارع.. راح نفقد أهم مزايا هذا البلد، لو كل واحد يرمي باقي العشاء من شباك السيارة، ويضايقك لو معاك أهلك، ويهجم عليك في الدوار، ويسقط عليك لو ماشي في أمان الله.. وترجع بيتك كأنك خارج من معركة مو مشوار تجيب المقاضي.. أو تعبان آخر اليوم.. ولو وصلت مشوارك.. يعتمد: راح تلاقي موقف تحت العمارة وإلا كمان "دير راسك": الشعار الشهير إل بيرفعوا كل مبنى في جدة، حكومي ولا قطاع خاص.. المفترض جدلا إنك جاي ماشي أو طاير وما يحتاجلك موقف سيارة!! طبعا إنت مستعجل، تبغى توقف قريب الباب، يعني لازم تقفل على سيارتين ثلاثة مو مهم.. أرفع يدّك وقول "سامحني" وإنت خارج يمكن تطيّب خاطر الي إتعطل عن أعماله بسببك!! ما هو كمان خارج أصلا منكد لأنو ضيع ساعتين من عمره بدون فائدة وبرضو مصلحته ما إنقضت.. أصله يا سيدي الموظف المسؤول ما جا اليوم، شكله معزوق مع هادولاك قدّام مدرسة بنته، أو إنطلبت منه ورقة ما قالوله عليها من أول مرة.. مو مهم، بس إيش رأيك في المبنى؟!