(العطر والرسالة)

ليل الشتاء والبوح وأجمل هدايا
وخصلة شعرها والعطر والرسالة
وحلمٍ مضى وأمسى حديث الزوايا
ودمعة غلا هلت وعاشق لحاله
ونجم سرى يسمع أنين الخلايا
من خافق ما هز غيره جماله
تخيلوا.. حتى قبال المرايا
يلمح صدى صوته ورقة خياله
ذاب السهر من تمتمات الشفايا
ووسادةٍ تغرق لماضي طراله
كله لأجل غروٍ عديم الحلايا
ما فيه عيب إلا حلاه ودلاله
إليا تكلم كل حكيه سمايا
وإليا سكت هز الضمير وعنى له
له ضحكة تفضح جنون النوايا
فيها الغرام العذب سايق دِلالِه
مدري..متى أضمه وتروى حنايا
فيها عطش لقياه طوّل سؤاله
تعال يا حضن الغلا يا دفايا
وهات الهدية والعطر والرسالة