العطايا ..

ويتوارى كنّه اللي راح ، والدنيا بخيله
والعطايا ما تمد كفوفها بعض العطايا
وايتلاشى حلمي اللي ما بقى بيديه حيله
حاول انه يقتربني واقترب واصبح بقايا
مدري الحظ التعيس اللي ذبح عمري قليله
او هي أحزان الغرام اللي بكا بين الحنايا
يا حبيبي والدروب اللي تجيبك مستحيله
ما يجيبك غير ليل ٍ يحترق جمر وخطايا
كيف ابانسى ليلتك والصوت واللي سال سيله ؟
وكيف ابانسى لعبة التوت الحمر بين الشفايا ؟
والله إني ما هقيت إن الهوى يعلن رحيله
لين شفت عيون ( ... ) تنكسر مثل المرايا
آه يا من لو كرهني يكسر العزّ ونخيله
وآه يا من لو عشقني يمتلي قلبي صبايا
مترفٍ كن القصايد تحترق شوق وتجي له
كل بيت يقول جعلي فدوة لذيك الحلايا
مترفٍ والموت ياخذ من هدب عينه وسيله
ويتغلغل بالقلوب وتكثر بعينه ضحايا
مترفٍ من ذاق حبّه باع لعيونه قبيله
سحر عينه حق ما هي لعبة حبال وحيايا
إن تمرّد صبح خدّه واعتنق ليل الجديله
آمنت سود القلوب وعانقت بيض النوايا
مترفٍ يطري عليّ ولا ذكرته طال ليله
بين دمعات المحاجر وابتسامات الزوايا
يدري ان القلب نار وقرّب البعد وفتيله
واحترقت بنار فرقاً سوّت بقلبي سوايا
حطنّي بين التمني والمسافات الطويله
وكان هذي من هدايا الحب يا شين الهدايا
لا توارى كنّك اللى راح والدنيا بخيله
مد لي بعض العطايا كان باقي لي عطايا