(هنت الغلا)

منك الجفا شفته وبانت مواريه
والهجر من عينك تراني لمحته
كانك نويت البعد وانحل طاريه
باب الهجر قفله لامن فتحته
والقلب باوصيك حاول تعزيه
وان رحت غمد جرحك اللي جرحته
قلبي هقا بك مير خابت هقاويه
دام الخفوق اللي يحبك طمحته
اثر الوفاء ياخاين الود شاريه
وانا احسبه من نبض قلبك منحته
الوصل ماخليت له درب يمشيه
هنت الغلا والحب برضك طرحته
جاك القصيد وليت تفهم معانيه
لك من صميم القلب والله نفحته
احسب خفوقي في الهوى زاهدٍ فيه
واثره كريم الحب وانته فضحته
شديت قلبي لينه افلت عراويه
واهديت لك قلبي وبيدك ذبحته
والحين دام البعد بانت عصاريه
بمسح غلاك اللي بقلبي نحته
ماني مكثر في العتب والمشاريه
مدام دستور الغلا قد مسحته
اليا وصلك الشعر واصبحت قاريه
قلي من الفرقى وش اللي ربحته