قصيدة “الحنين” للشاعر سطام بن سلمان

الحنين اللي عسف قلبي وساقه يمّك
كل ليله في غيابك ” لوعته ” تسهرني
••••••
وانت لاهي تحسب انّي لاهي ومااهتمّك
وآنا من همك أردد .. (يالله تصبرني)
••••••
تحت جنح الليل اشوفك بالوهم واضمّك
ومع نسيم العاشقين طيوفك تسامرني
••••••
منقطع عني ولا ادري كان وصلي همّك
عايش بغم وتعاسه والحزن آسرني
••••••
خايفً ! حقد العواذل بالبعاد ايغمّك
وتكبر عزومك على الهجران وتهاجرني
••••••
والعواذل مثل ماهي اتذمني أتذمّك
ودها تقهر خفوقك بالجفاء و تقهرني
••••••
ياشبيه الورد ليت اقوى اقطفك واشمّك
وازرعك حول (الحنايا) نبتةٍ تزهرني
••••••
جيتك من الشوق عاني وانحنيت للمّك
لمني من بعد ماكان الجفاء “ناثرني”
••••••
خل روحي تهتني بك واسقني من جمّك
لين يروّى كل عرقٍ بالجسم ضامرني
••••••
وان خطر لك بعدها تذبح خفوقي بسمّك
طالبك ف تراب حضنك تحفر وتقبرني
••••••
الشاعر/ سطام بن سلمان