علمي بها بأيام سن الطفولة

علمي بها بأيام سن الطفولة
عهد البرائة والغلا بين الاطفال
نلعب ونمرح وانتلاقا بسهولة
نتبادل الضحكة على كل الأشكال
لو اتأخر يوم جتني ذهوله
يسوقها لي الغلا دون مرسال
بالليل اخوفها ولاهي زعولة
تقول ماني خايفة وانت حيال
لا قلت جاك الذيب جتني جفوله
وليا اشبكتني قلت ياعمري ظلال
وكم مرة قلت ادرسي ياكسولة
تضحك وتعفشني تقول انت محتال
ماني سواتك وتحسبني مهبولة
شطورة ولابي مثل غيري هبال
وكم مرة مثلت دور البطولة
افزعلها واسوي سوات الابطال
كل ما اشتكت من طفل زود فضوله
ابهدله واعطيه كف ليا عال
كبرت وصارت نور عيني خجولة
واصبح وجودي حولها يسبب اشكال
قالت تضل النفس يمك ميولة
واشفق لشوفك يابعد كل الأزوال
والله ماني من وجودك ملولة
لكن بلاي بعينهم صرت رجال
زولك طويل وصعب حولي قبوله
ومرات اشوفك تلبس شماغ وعقال
ترى الأهل راحو لبوك وشكوله
وادي المفارق بيننا فيه غربال
والله مهما حاولو او حكوله
تبقى الحبيب اللي له القلب ميال
ياما منعني والدي عن وصوله
وياما على ظهري عطاني من عقال
قال الغلا له حد واعرف اصوله
واللي مثل سنك يصيرون عقال
ما يدري ان العقل صعب حلوله
واجسامنا تنبض بها قلوب جهال
وشفيك يادنيا مشيتي عجولة
كم ضاع بأسبابك أماني وآمال
من بعد ما كنت انتظر شوف زوله
قامت تبكيني صورها والأطلال
الروح صارت بالفراق معلولة
وصار الغلا لصويحبي حب بهبال
ياحظ منهو في حياته ينوله
ملاك بعيوني على الأرض تختال
جاها حظيظ غيري ووافقوله
وتحطمت بقلوبنا كل الآمال
راحت بعيد وصارت بغير دولة
لكن غلاها بالحشى حي لازال
ماطاع قلبي في غلاها عذوله
ولايمكن انساها ولا أطيع عذال
ليت الزمن يرجع بنا للطفولة
وابقى طفل. ما ودي أصير رجال
الاطرق بن بدر الهذال