“ريح ضميرك” قصيدة للشاعر عبدالله سعد الروقي

ريّح ضميرك يا صديقي قبل تقفي سنينك !
ما فات مات و ما بقا واجبٍ منك إغتنامه
••••
لو تعتبر باقي سنينك ؟ أمانه في يدينك
أحييتها و أحييت نفسك على عز و كرامه
••••
تأكدّ إن اللوم لا من وقف بينك و بينك ؟
مشهاب نارٍ طاح في طارفة مقذول خَامه
••••
و تأكدّ إن الحزن لا بان في نظرات عينك ؟
ما تستره ب الإلتفاته و لا ب الإبتسامه !
••••
و تأكدّ إن الحظ و الرزق شامه في جبينك
لو ما تراها العين شامه ؟! خلقها الله شامه
••••
وقّف و عِدْ ترتيب الأوضاع و إبداها ب دِينك !
درب الجِنان الخِضر ما غير درب الإستقامه
••••
تصنعك سيّد عند الأجواد : خدمة والدينك
و تصنعك خادم عند الأسياد : مدحك للهِلامه
••••
بُخلك يطوّل سالفة ذمْك و يقصِر يمينك
و إن عشت بين الناس ما عشت به مرفوع هامه
••••
إن عزّك الله ( ب الثقه ) ما أحد يقدر يهينك ؟!
و إن جاك شي من الكِبر قول ي الله السلامه
••••
ركضك ورى مجدك لو إنك ما تلقى من يعينك ؟
هذي شجاعه و الشجاعه ما تقفاها الرخامه
••••
و أجمل : من اللي يحضنك كل ما جابك حنينك
اللي بعيدٍ عنك لكنّ معطيك إهتمامه
••••
و من الغشامه تدري الناس عن زينك و شينك ؟!
و إليا دروا عن سِر صدرك تراها أكبر غشامه
••••
عامِل عِداك ب قسوه ،، و عامِل أحبابك ب لِينك
و هذي طبيعه ف الخلايق و لا فيها ملامه
••••
ماهو ضروري كل ما غبت ندري عنك وينك ؟
لا صرت ذيبٍ ما سرا غير يبحث عن طعامه
••••
نصيحةٍ ما هيب من واحدٍ من عاذلينك !
من واحدٍ يحسب كلامه و يمشي مع كلامه
••••
خابرك ( طيّب ) و أكثر الناس مثلي خابرينك
ما يلحق اللي ينصحك صادقٍ معك الندامه
••••
ريّح ضميرك و إستتر ب الصبر باقي سنيك ؟!
العالم الله ما بقى شيّ عن يوم القيامه .
••••
الشاعر: عبدالله سعد الروقي