جامعٍ علم المراجل

قصيده مهداه إلى سعود بن سعيد السمري الأكلبي
بسمك الله ابتدي قبل ما ابدى بالقصيد
وقبل مابين لكم وايش غاية مطلبي
ياعظيم الشان يا كافل رزق العبيد
يامدبرنا على مايريد وما يبي
من بعدها حضري ياهواجيس النشيد
عبري لي ياهواجيس شعري واكتبي
اكتبي جزل المعاني وطرق مايحيد
في هل الوقفات عز الرفيق والاجنبي
قاصدٍ بيشه واهلها هل الرأي السديد
ودي اوصل سلامي لهم عود وصبي
والسلام يعم ويخص لك يابو سعيد
الكريم اللي خذا الطيب من خالٍ وأبي
اشهد انه سعود سعد القريّب والبعيد
لا غرابه منه مادام سمري وأكلبي
الوفاء فيهم قديمٍ ماهو شي جديد
عادةٍ من عهد جده كليب التغلبي
أكلبيٍ لابدا لازمه ماهو يحيد
حاضرٍ بالجاه والوجه بيّن ماغبي
الرجال ومعرفتهم تجارات ورصيد
وبو سعيدٍ راس مالٍ وربح ومكسبي
جامعٍ علم المراجل مع طيبٍ وجيد
والسلوم اللي تنومس عريب المنسبي
والخوي يلقى الكرامه ويلقى مايفيد
والله إن هذي حقيقه بدقني وشنبي
واطلب الله جعل عمره على الدنيا مديد
وجعل شكله واجد في الخليج اليعربي
وخاتمتها نرجو العذر في بيت القصيد
ياصلاتي ياسلامي على وجه النبي
الشاعر/ مجهار حسن ال كناد القحطاني