ازمة الرياضة الكويتية دخلت شهرها الثاني والوضع على ماهو عليه !.. ايقاف وحظر دولي وتبادل اتهامات بين المجموعتين (كله منكم انتم السبب) كأن الموضوع ما يتعلق بسمعة بلد .. اللهم يا كافي رياضينا ورياضتنا صارت حالهم حال البعير اللي منهكه الجرب الكل يهرب عنه مع ان العلاج بسيط كل ما بالامر البعير يطلاء بالدواء ومع الله كلها كم يوم يغدا شره هذا انت يالبعير .. واما عندنا بالكويت فرياضتنا صابتها كل الامراض ولليوم ما فيه تدخل حاسم قاطع ينهي هالموضوع الشائك اللي دمر رياضتنا واضر بجاهزية رياضيينا .. وبدل مالجماعة اصحاب القرار يلجأون الى القضاء العالمي ويطالبون بعودة الرياضة الي سابق عهدها .. نلقاهم يقدمون لنا تصورات ورقية تخديرية عن استراتيجية لاصلاح الملف الرياضي لرفع مستوي الرياضة اشلون انا مادري ؟ .. يا حبايبي الرياضة موقفة والمشاكل بين الاندية والاتحادات ما لها عدد وانتم تقترحون اوهام ورقية بالاول اصلحوا حال الرياضية وبعدين تصوروا وتخيلوا على كيفكم .. وياليت الامر وقف على التصورات بل تعدتها الى زف البشري بان هناك اخبار ساره سيسمعها الجميع في ديسمبر عن استاد جابر الذ اصبح الشغل الشاغل للحكومة وقامت تسابق الزمن لافتتاحه مع ان الاستاد منور مكانه منذ خمس سنوات ! .. استاد ايه ياعمي حنا نبي نشارك مع دول العالم بالرياضة ونشرك شبابنا بدل من اللعب محلي والاستاد مو ذات اهمية عند الشباب الرياضي لانهم زهقوا من وضعنا الرياضي .. وانا عندي قناعة انهم على استعداد على اللعب بملاعب رملية ولا يطول الايقاف .. وقبل ما اختم اوجه رسالة للحكومة (وين الحل ياوزير) واقول انتم ابوها وسموها اللي ماهو معاكم وقفوه وجيبوا غيره لان الكثير من الشباب على استعداد بالعمل بالمجان لمصلحة الكويت الله يحفظها لنا وسلامتكم . ألووو اخير : قالوا للديك صيح .. قال كل شئ بأوانه مليح . محمد خلف الشمري
