قبل كم يوم كتبت كتبت تباشر جماهير ولاعبين الجهراء بلعب مباراتهم مع السيب العماني على استاد مبارك العيار بدور الثمانية من البطولة الخليجية بعد موافقة وزارة الاعلام شراء حقوق المباراة من الشركة الراعية .. وليتها ما وافقت على النقل لان الفريق (خبقها) تحت انظار عشاقة اللي ما قصروا لبو نداء فيديو برومو (والله مادري شنهو معناه ) جماهير الجهراء فزعتكم الاربعاء واللي قام باداءه كم لعب من الفريق .. ما اطولها عليكم كاميرات النقل والجماهير الجهراوية وروابط الاندية حضرت تؤازر وتدعم رابع الدوري الكويتي امام متذيل الدوري العماني لكن الفريق لم يكن حاضر بالملعب ماندري شنهو السبب هل الفريق ما احترم خصمه ولا عمل له حساب ؟ .. او افراد الفريق عجبتهم الاضواء اللي تسلطت عليهم فجأة وانشغلوا بمتابعة البرومو ومتابعينه بمواقع التواصل الاجتماعي (عمره ماتبخر تبخر واحترق ) ؟ .. ما عليه يا اخوان هذي اسئلة تدور في بالي بعد مشاهدت الفريق على ارض ملعبه بالجهراء وارجوا ان تجد لها حلول عند ادارة الفريق ؟ .. لان الفرصة يمكن ماراح تتكر للفريق مره ثانية وقبل لا اترك الجهراء واستلم ممثلنا الثاني كاظمة ياليت الادارة الجهراوية ما تجدد عقد مدربها ميودراج لانه اثبت فشله وخير دليل ابقاءه للاعبيه الاساسين على مقاعد الاحتياط بالمباراة ويوم بغا العون منهم خذلوه لان الفريق ما كان بيومه هذا اللي عندي والامر لكم ! .. واما بخصوص ممثلنا الثاني فهو خرج بفضيحة للاسف الوسط الاعلامي سكت عنها ولا طرحها للنقاش مادري ماهو السبب بذلك ؟ .. معقولة السفير يطلع على يد فريق من فرق الدرجة الثانية بقطر مع احترامي الكامل للريان وجماهير بس انا اتكلم بحكم وقوعه بالدرجة الثانية وفريقنا يعتبر (طبقوا الدمج كرمال عيونه ) من ابرز الفرق الكويتية .. يعني زبدة الحجي بيننا وبين الفرق الخليجية فرق شاسع بالمستوي اجل لو فرقنا تلعب مع فرق المقدمة بالدول الخليجية وشراح تسوي اكيد هزائم مالها كم ولا عدد .. وقبل الختام ارجو من اتحاد الكرة عدم ترشيحه فرق الكويت للبطولات الخليجية بالبطولات القادمة لان اللي حصل لفريقا الجهراء وكاظمة فضيحة كاملة الدسم وسلامتكم . ألووو اخير : يجعل شفا الدكتور على يد التمرجي .
