كيك وحلاوة بشكلك

بعذرنا لو ما نتطور لين ميتين سنة جاية، ويمكن بعد كان ما فيه شهور كسيفة تزود المدة ونمحط ازود، صرنا ما عاد نبي نفكر، أي شي يحرك خلايا المخ يتعبنا، نصير كننا راقي برج ايفل «بدينا التميلح، شكلك ما تعديت تفتيش خريص»، ترى كل شي يدل على تخلف او تحضر الشعوب، حتى كلمات الاغاني، الفنانين هم سبب هالنكبة هذي كلها، هم السبب في دحدرة الذوق العام اللي اصلا على جريف ما يبيله لو تمر من جنبه جاك على راسه، زمان الكلمة في الاغنية هي اللي عليها الكلام، الحين الفنان يخم أي شي ويغنيه عشانه ناحش من المتوسطة ومبيد حيل ابوه الا يطلع فنان، ويوم بدت القريشات تمشي بيده وكثر خيره واشترى له بيت، الوالد رضى عليه خصوصا انه كل ما دق عليه يبي واسطة يلاقيها على طول، دخل اخوانه كليات واللي ما فلح منهم اشترى له بقالة وسيارة وخلاه رجال زي الباقيين، واخته اللي متزاعلة مع رجالها دق على زوجها اللي ما صدق ان الفنان فلان المشهور يدق عليه بنفسه ويعزمه على الحفلة وفوق كذا يدفع للزوج نصف المهر اللي كان متسلفه المسكين عشان يتزوج اخته، طبعا قبل لا يصير فنان والا كان ما تزوجها!