لاعب عالمي ..موضة أنديتنا كل صيف!

• يا هلا ومرحبا باللي لفونا من بعيد.. وكالة لول للأخبار اللي ما تخر الماء ترحب بكم.. يا ألله إنه يحييكم.. اقلطوا والمعذرة على قل الكلافة.. خلوكم من وكالات الاخبار الثانية، ما غير تهايط عليكم.. واخرتها تضيق خلكم وانتم فيكم اللي مكفيكم والسلام عليكم.. خلونا ندخل بموضوع النشرة حقتنا.. ما ودنا نضيع وقتكم وانتم ناس مشغولين ووراكم مشاغل ولا عندكم وقت للتبطح قدام تليفزيونات اخبار خلق الله «ايه هين».. وحفاظا على وقتكم اللي من ذهب نبي نذهب لاستديو الاخبار وابشركم الغينا نشرة الاحوال الجوية اللي لقينا انكم تضايقون من كذبنا فيها ومستحين تطقونها في وجيهنا.. لبى قلوبكم والله.. مشاهدين حبوبين.. دامكم كذا.. راح نكون احب منكم.. ولا راح نجيب لكم اخبار ترفع ضغطكم او تنكد عليكم.. انتم بس زلبوا الاخبار حقت الثانيين وابشروا بالاخبار اللي تدسم شواربكم.. على طاري الاخبار اللي تدسم شواربكم شرايكم نسمي اخبارنا مضارب الاخبار.. احسها تناسب علوم القبايل اللي بوكالة اخبارنا..
• هذا خبر جانا من وكالة د ب أ.. تقول دبأ ان فيه نجم قاعد ياكل كوكب.. ادري اتلحستوا من هالخبر.. ولا تدرون وش السالفة.. حنا معاكم ان الخبر واسع شوي.. ويبي له مخ اكبر من صالة بيت.. بس لا تخافون راح نفسره لكم حبة.. هذا الخبر نرده عن ناسا حقت الرحلات اللي تروع.. حقت الاقمار الصناعية.. تذكرون الصاروخ اللي حاطين وجهه فوق ومركبين فوقه مركبة فضائية.. ولا انطلق الصاروخ فوق زي البرق ما تفطن الا وهو منحرف تحت وتارك المركبة تطير على ما سهل الله.. عقب يخبط الصاروخ بالبحر والمركبة تغيب ورا ما ادري وش وراه.. ونوبات ما يتهيأ للمركبة تفتك من الصاروخ ثم يقبس بها الا هي وياه متحولين نار كنه طالع من فم تنين، الله لا يبلانا.. وهالشي هو اللي حدني ما يصير رائد فضاء.. المهم خلونا بخبرنا.. ترى ما يصير ان المذيع يتميلح قدام المشاهدين.. هذي يسمونها بثارة.. ما لكم بالطويلة.. ناسا تقول ان النجم قاعد ياكل الكوكب.. وهالوجبة يقولون انها راح تستمر عشرة ملايين سنة.. طبعا.. انت الحين لا كلت شاورما غير لا قلت جامبو.. اللي قاهر حقين ناسا.. ان المسكين اللي راح طعوم نجوم.. راح يكون اختفى ببطن النجم وفيه مواد كيماوية، ودهم يشوفون وشي من لحية بس ما راح يمديهم.. طبعا ناسا ما قالت للحين.. هو النجم يوم اكل الكوكب شرب وراه كوب لبن.. والا ممنوع من اكل الدسم!
• برضه خبر من نفس وكالة دبأ.. والظاهر انها اليوم ناوية تشبعنا اخبار تهاويل لين نقول بس، عاد انتم خلكم ذهينيين.. اتخذوا طريقة خذ وخل للانباء.. تراها اريح طريقة.. اكيد كلكم تعرفون عمرو موسى.. ريس الجامعة العربية.. خوش رجال.. صاحي.. ذهين.. مرات يقول ابي اصير ريس لمصر.. ومرات يقول تعبت من الرياسات ابي اجلس بالبيت انتبه لعيالي.. البارح يقول ان منطقة الشرق الاوسط مع انها منطقة غثيثة.. وكلها طقاق في طقاق.. وكل دولة ماسكة حلق الثانية.. الا ان فيها رجا للحين.. ويقول ان فيه كم دولة لو يقبضون القاع ويترحنون كان صارت المنطقة وش زينها.. عاد حنا اخذنا كاميراتنا وطلعنا وما ادري وش قال عقب..