زمان الجهل

ما كان هذا العشم بك يا زمان الجهل
وما كنت متوقعٍ منْك الجهل يا زمان
خلّيتني بعد ماني لي مكان وأهل
وحيد ما لي أهل غريب ما لي مكان
يصعب على أصعب صعب يسهل على أسهل سهل
في عين من يفْرق الإنسان والحيوان
كم صوت رجلٍ عوى وكم صوت رجلٍ صهل
وكم بنت خرسا أذهن من الذيب ومن الحصان
والذاهن اللي من أحداث الزمن ما انذهل
لو إن أحداث الزمن تذهل عقول الذهان
واللي إذا ضاقت الدنيا عليه ابتهل
للواحد القادر المتكبر المستعان
من يولد الرجل طفل إلين يصبح كهل
وهو يعْرف إن العمر لو طال ما له ضمان
يمّر على عجل ويمّر على مهل
لو ينحسب بالسنين أو ينحسب بالثوان
يا أنصف إنسان، وسّع خاطرك واسفهل
ولا عاد تبكي على ظلمي، يا أنصف إنسان
ما ضاق صدري من الدنيا ولا الدمع هل
حتّى لو إني أشوف الظلم شوف العيان
رشيد الدهام