وين حماية المستهلك؟

كثير من الجهات ببلدنا نسمع باسمها ولاعمرنا شفناها.. يعني أنتم يا سكان السعودية نحو عشرين مليون نفر(سفري بدون رز)!! اتحدى واحد منكم يعرف واحد يقول أنا أشتغل بحماية المستهلك!! ياخي وين هالناس؟ بذمتكم قد حصل وأنتم تتسوقون باي سوق شفتوا واحد منهم يناقش راعين السوق ببضاعة مخالفة؟.. عمركم شفتوا لهم مكان؟ تعرفون لهم أرقام؟ عمركم قريتم إعلان يقول: حنا حماية المستهلك أبشر يالمواطن بعزك وهذي أرقامنا إذا شفت شي ضد مصلحة الناس.. نفسي أشوفهم زي حقين المرور.. يطفون الأنوار ويلبدون تحت الكباري وإذا مريت من جنبهم كفخوا النور العالي بوجهك (عشان ما تنكر أنك كنت مسرع) وتصفق عند نقطة التفتيش وتاخذ مخالفتك وأنت ساكت.. مو مشكلة خالفونا.. خذوا اللي تبون.. بس خلونا نشوفكم.. نشوف شغلكم عشان نرتاح.. في ذمتي لو طلعت ببرنامج من سيربح المليون وكان سؤال المليون: اذكر لي اسم أي واحد تعرفه من حماية المستهلك؟ في ذمتي أني غير أخسر الجايزة.. مع أني يوميا أقرأ الجرايد.. أدور لهم حس ما لقيت.. يمكن لو تحول اسمهم من حماية المستهلك إلى الحماية من المستهلك كأن تشوفهم يطلعون لك من تحت الأرض: تعال يا مواطن.. ليش شماغك من النوع البلدي اللي يؤثر على البيئة يالله هات غرامة ميه وخمسين.. تعال يا مواطن ليش تتنفس واجد عليك غرامة شفط هواء البلد دون مراعاة غيرك من المواطنين يالله ادفع أربعين ريال.. ياخي اطلعوا.. ودنا نشوفكم.. اطلعوا.. حرام عليكم.. اطلعوا.. عشان ما نخسر سؤال المليون ريال!