ابعد عن الشر

لا تقولي انك مش عارف وش معنى (الشر)، الشر يا سيدي أحيانا تشوفه واضح ما تحتاج احد يقول لك: هذا شر انحش، وفيه شر مخفي ما تكشفه الا بعد ما تلاقي نفسك متوهق ولا يعطيك فرصة تنادي أحد يفزع لك، بعض الناس عنده قلب يدله ويعرف الشر مجرد ما يمر بجنبه، وبعض الناس قلبه اهبل ما يوديه إلا لحفر الشر وأهلها، حلوة نصيحة ابعد عن الشر، بس اللي قال هالمثل في زمانه ما كان فيه شر يطاردك وين ما تروح، تبعد عنه وتلاقيه طالع لك من الجهة الثانية، لأن الشر مثله مثل كل شي بهالزمن طور نفسه ومهاراته زي الفيروسات اللي تطور نفسها عشان تخرب اكثر، قال ابعد عن الشر وفهمناها، بس ما فهمنا ليش نغني له، هو الشر يحب الغناء؟ والا إذا سمع غناء يوقف وما يجيك والا إيش الموضوع بالضبط، ما يصير يا ناس احد يقولون لنا حكمة ويروح ولا يفسرها لنا، من فينا يفهم وش معنى غني للشر؟ في هالأيام، الشر جايك جايك هربت عنه والا ما هربت، غنيت والا ما غنيت، ليش لأن الشر صار بكل مكان، وصار زي المجرمين اللي لهم ألف جواز وألف صورة، كل ما تتوقع أن فلان آدمي كويس وابن حلال يطلع هو باخر حلقة الشخص اللي عطاك الضربة القاتلة، عندنا إحساس أن المثل هذا مضروب وأي كلام، لأن الشر إذا شافك جامد وواقف بمكانك يدور غيرك، نصيحة لا تغني له، لأنك كل ما غنيت له أغنية يقول لك سمعني كمان ولا يفكك الا الظهر ثاني يوم، ويمكن يخش جو زيادة وانت تغني له يرميك بالرصاص، انتبه يا غافل ترى أهلك بانتظارك حاول أن تعود لهم سالما.