خرابيط الحب

يضحكك هالشباب اللي يتبطحون قدام الأفلام ويبون يسوون زي بطلة المسلسل، والبطل اللي كنهم عصافير ياخذون العقل، اللي يصدق المسلسلات أن فيه حب هذا ودك تضربه بطلقة سكتون على راس خشمه عشان كل من واجهه يعرف أنه دلخ وسبهه، أنت مهبول تدور سوالف المسلسلات على أرض الواقع، صاحي أنت؟ سوالف الحب، وانا خالك بس للتمثيل ومالتمثيل، ما لها خص باللي قاعدين نعيشه، مجتمعنا الله يحفظه من يوم انخلق إلى اليوم وهو نظامه بالزواج واحد، أهلك يخطبون لك وأنت رح فصل بشت وثوب واشتر شماغ، لا تصدق أن فيه اثنين بهالمجتمع يتزوجون عن طريق الحب راح يكونون سعيدين، ولا تقول ما راح أحد يعرف أننا تزوجنا وحنا كنا نكلم بعض؛ لأن الناس راح تعرف وساعتها راح تطيح من عيونهم وراح يعتبرونك واحد ما عندك غيرة ولا حمية، كيف تتزوج وحدة كنت تكلمها وتكلمك، هذا شي لا يمكن مجتمعنا يقبله، وإذا تبي نصيحة أخوك ابو العريف، اقضب ارضك وخلك من المطامر ومداور الحب وسوالف الحب، ترى ازين حب وأبرك حب هو اللي بعد الزواج، لا تقول كيف نحب بعض وحنا ما شفنا بعض الا في ليلة الدخلة، ما فيها شي، ابدأ الطريق من جديد، وخلك أول يوم زواج لك هو أول يوم حب، اشرح للكمخه اللي انت متزوجها، وفهمها أن احلى ما في الدنيا الحب الشرعي، ما هو حب الكمخة مهند، يااااكرهي!