زعطة السفر!

امس كنا نتكلم عن ربشة السفر ومشاكله وهمومه، واليوم شرايكم نكمل الموضوع؟ هاااا وش رايك انت ياللي مسوي حالك انك مو مهتم ومطنش، عاد حنا من فضل الله اكثر ناس نسوي حالنا مهمين وغيرنا طناش، وبالذات بالسفر، تشوف ربعنا في السفر كنهم داخلين مجاكر على احسن واحد يلبس ومشخص اكثر من الثاني، ان رحت للسوليدير تلاقيهم مبلطين على الطاولات من الليل لين يطلع الصبح، ما تدري ليش؟ يعني لو تجيب واحد صاحي غير الخليجيين ما يتحمل انه يجلس على كرسي خمس ساعات كاملة، ولا يهون بعد الشانزليزيه بس على شكل اقوى شوي من السوليدير، يعني تشوف واحد لابس بشوي وشويات وهو جاي للسفر بفيزا، اهم شي ان الناس يشوفونه ويقولون اخس اكيد ابوه تاجر سيارات، اهم شي عندنا بالسفر اننا نوري غيرنا اننا مهمين، تشوف واحد يمشي وراه ثلاثة بودي قارد؟ وهو يمشي قدامهم يسوي حاله مدير البنك الدولي، وهو لو وقف بنص الشارع ماحد سارقه لان الشعوب الثانية صارت عارفه البير وغطاه عنا، صاروا يدرون ان اكثر واحد يتفاخر هو اكثر واحد ماخذ بطاقات فيزا وسلفيات، مدري ليه كل شعوب الدنيا يسافرون عشان ينبسطون ويفرفشون وحنا نسافر عشان نجاكر ونتحدى بعض، قبل كم يوم شفت واحد الله يشفيه، جاي السفر ومتكلف بس عشان يوري الناس ان سيارته رنج، والمشكلة ملبقها على مدخل مطعم عائلي محترم ومسكر المدخل يادوب تدخل، وكل ما يدخل احد يدعي عليه ويسب السعودية بسبب واحد متخلف مثله، لان الناس اللي الله منعم عليهم وعندهم رنج مو اقساط لا يمكن يسوون كذا لان الرنج عندهم شي عادي ويعتبرونه وسيلة مواصلات مو وسيلة ياناس شوفوني.