ترتيب الصف والذي منه

غريب هالشخص صراحة، اعتقد انه حالة يبي لها دراسة وابحاث لأنهم ممكن وقتها يوصلون لعلاقة حقيقية بين المصارعة الحرة وتربية الماشية وتنظيم خطوط المشاه، نتج عنها موظف مطار يستقبل الواصلين من رحلات خارجية!
يعني تخيل نفسك جاي من رحلة ست مدري سبع ساعات، وتعبان وحالتك حالة، ولسا وراك مسكة سرا واستلام عفش واجراءات ودنيا، ويجي الأخ هذا ويتعامل معاك كأنك طالب اولى ابتدائي جاي متأخر ومدخل معاه سيجارة وواقف في طابور صف رابع.. الفرق ان الطالب يمديه يسوي نفسه مؤدب ويلتزم بالمطلوب منه ويخليه المدرس في حاله، لكن انت في طابور المطار لازم تكون عارف انك متهزئ متهزئ سواء صرت مؤدب والا ما صرت!
طيب يا عمي عرفنا، انت رجال تبي ترتب الصف، ما قلنا شي، وشو له العصبية والصراخ طيب، يعني جربت تقول لاحد مثلا روح المكان الفلاني وعيا عليك؟ ليش من هو اصلا اللي بايع نفسه اللي يقدر يسوي لك كذا، نسيت انك تستخدم مهاراتك الخلاقة احيانا في الضرب والتبقيس، طبعا لأهداف مشروعة زي ما قلنا.. ترتيب الصف!
باقي لنا سؤال كذا صغير.. اذا كان هالاسلوب هو اول شي يشوفونه الناس اللي جايين من برا.. وبعضهم اول مرة يطب ديرتنا.. ظنكم وش بيقولون للعالم عننا؟